امتياز عادّل سومرو
” نِگھبان تون مولا“
هِنَ سنڌ جي گُلشن جو نِگھبان تون مولا
گــُل گونچ جو، شاخُن جو نِگھبان تون مولا
شب روز اچي روح کي راحت ٿيون رسائن
هيرُن جو، هوائن جو نِگھبان تون مولا
تهذيب و ثقافت جو رهي شان سلامت
ريتُن جو، رواجن جو نِگھبان تون مولا
من من جي مزي موج ۽ دل دل جي خوشيءَ جو
مُرڪُن جو هي ٽهڪن جو نگهبان تون مولا
پَٿر ٿا لڳن پيار جي پيغامبرن کي
الفت جي اسيرن جو نِگھبان تون مولا
قائم آ اڃا ڏيھ ۾ ڏهڪلاءُ عُمر جو
مارُن جي وٿاڻن جو نِگھبان تون مولا
هن ڀُونءِ جي هر ڀينڊ ڀتر،ڇَن ڇَپر جو
لوڙهَن جو ۽مَنَهَن جو نِگھبان تون مولا
بستيءَ جو بَحَرَ بَرَ جو وَستيءَ جو وسهن جو
هر شهر جو ڳوٺن جو نِگھبان تون مولا
رقصان ٿو ڏسان بجلي ۽ طوفان جي شدت
بس آهين چَراغن جو نِگھبان تون مولا
هِنَ دِل جي حَقيقت کي رُڳوتون ئي ٿو ڄاڻين
عادّل جي اُميدُن جو نِگھبان تون مولا
No comments:
Post a Comment